புதுக்கோட்டை மாவட்டம் ஆலங்குடி அருகே வீட்டு கதவை உடைத்து சுமார் 50 பவுன் தங்க நகைகளை புதன்கிழமை இரவு மர்மநபர்கள் திருடிச்சென்றனர்.
ஆலங்குடி அருகேயுள்ள கொத்தமங்கலம் ஊராட்சி சிதம்பரவிடுதியைச் சேர்ந்தவர் தங்கமணி (45). இவர் சிங்கப்பூரில் வேலை பார்த்து வருகிறார். இவரது மனைவி லதா வீட்டை பூட்டிவிட்டு புதன்கிழமை நடைபெற்ற கொத்தமங்கலம் பிடாரியம்மன் கோயில் முளைப்பாரி திருவிழாவில் கலந்து கொள்வதற்காக சென்றுள்ளார். திரும்பிச்சென்று வீட்டை பார்த்தபோது கதவின் பூட்டுகள் உடைக்கப்பட்டு இருந்ததை கண்டு அதிர்ச்சி அடைந்த அவர் உள்ளே சென்று பார்த்தபோது வீட்டுக்குள் இருந்த சுமார் 50 பவுன் தங்க நகைகளை மர்ம நபர்கள் திருடி சென்று தெரியவந்துள்ளது.
இதுகுறித்து தகவல் அறிந்து அங்கு சென்ற கீரமங்கலம் போலீஸார் விசாரணை மேற்கொண்டுள்ளனர்.
புதுக்கோட்டை: சிங்கப்பூரில் மின்னல் தாக்கி உயிரிழந்த புதுக்கோட்டை மாவட்டம் வடகாடு பகுதி இளைஞரின் உடலை சொந்த ஊருக்கு கொண்டுவர தமிழக அரசு நடவடிக்கை மேற்கொண்டுள்ளது என்றார் மாநில பிற்படுத்தப்பட்டோர் நலத்துறை அமைச்சர் சிவ.வீ.மெய்யநாதன்.
ஆலங்குடி அருகேயுள்ள வடகாடு ஊராட்சி சேர்வைகாரன்பட்டியைச் சேர்ந்த மதியழகன் மகன் செந்தூரன்(25).தொழிற்கல்வி படித்துள்ள இவர், சில மாதங்களுக்கு முன்பு சிங்கப்பூருக்கு வேலைக்கு சென்றுள்ளார். அங்கு உள்ள கட்டுமான நிறுவனம் ஒன்றில் வேலைபார்த்து வந்த அவர், திங்கள்கிழமை ஒரு கட்டடத்தில் வேலை பார்த்துக்கொண்டிருந்தபோது மின்னல் தாக்கி செந்தூரன் அந்த இடத்திலே உயிரிழந்தார். இதுகுறித்து சிங்கப்பூரில் அவர் வேலைபார்த்து வந்த நிறுவனத்தினர் கைப்பேசி மூலம் அவரது குடும்பத்தினருக்கு தகவல் தெரிவித்துள்ளனர்.இதைக்கேட்டு அதிர்ச்சியடைந்த பெற்றோர், உறவினர்கள் பெருந்துயரடைந்தனர்.மேலும் அவரது உடலை சொந்த ஊருக்கு கொண்டுவர தமிழக அரசு நடவடிக்கை எடுக்க வேண்டுமென அவரது பெற்றோர் கோரிக்கை விடுத்தனர்.
இந்நிலையில் உயிரிழந்த இளைஞரின் வீட்டிற்கு சென்ற மாநில பிற்படுத்தப்பட்டோர் நலத்துறை அமைச்சர் சிவ.வீ.மெய்யநாதன். அவரது பெற்றோர் மற்றும் குடும்பத்தினருக்கு ஆறுதல் தெரிவித்து நிதி உதவி வழங்கினார்.
அப்போது, தமிழக முதல்வர் உத்தரவிட்டதைத் தொடர்ந்து, சிங்கப்பூர் வெளியுறவுத் துறை அதிகாரிகளிடம் தமிழக அரசு சார்பில் பேசி உயிரிழந்த செந்தூரனின் உடல் சொந்த ஊருக்கு கொண்டுவர நடவடிக்கை எடுக்கப்பட்டுள்ளது. அதன்படி, இளைஞரின் உடல் நாளை பிற்பகல் சிங்கப்பூரிலிருந்து விமானம் மூலம் திருச்சி கொண்டுவரப்பட்டு அங்கிருந்து சொந்த ஊருக்கு கொண்டு வர நடவடிக்கை மேற்கொள்ளப்பட்டுள்ளது என்றார்.
புதுக்கோட்டை: சிங்கப்பூரில் பணியின்போது மின்னல் தாக்கி புதுக்கோட்டை மாவட்டம் வடகாடு பகுதி இளைஞர் உயிரிழந்த சம்பவம் அப்பகுதி மக்களிடையே சோகத்தை ஏற்படுத்தியுள்ளது.
புதுக்கோட்டை மாவட்டம் ஆலங்குடி அருகேயுள்ள வடகாடு ஊராட்சி சேர்வைகாரன்பட்டியைச் சேர்ந்த மதியழகன் மகன் செந்தூரன்(25).தொழிற்கல்வி படித்துள்ள இவர், குடும்ப சூழ்நிலை காரணமாக கடந்த 5 மாதங்களுக்கு முன்பு சிங்கப்பூருக்கு வேலைக்கு சென்றுள்ளார். அங்கு உள்ள கட்டுமான நிறுவனம் ஒன்றில் வேலைபார்த்து வந்துள்ளார். இந்நிலையில், திங்கள்கிழமை கட்டடத்தில் வேலை பார்த்தேக்கொண்டிருந்தபோது மின்னல் தாக்கி செந்தூரன் சம்பவ இடத்திலே உயிரிழந்தார். இதுகுறித்து சிங்கப்பூரில் செந்தூரன் வேலைபார்த்து வந்த நிறுவனத்தினர் அலைபேசி மூலம் அவரது குடும்பத்தினருக்கு தகவல் தெரிவித்துள்ளனர்.இதைக்கேட்டு அதிர்ச்சியடைந்த பெற்றோர், உறவினர்கள் பெருந்துயரடைந்துள்ளனர். செந்தூரன் உயிரிழப்பு குறித்து உரிய விசாரணை நடத்தி இழப்பீடு பெற்றுத்தருவதோடு, அவரது உடலை சொந்த ஊருக்கு கொண்டுவர அரசு நடவடிக்கை எடுக்க வேண்டுமென செந்தூரன் குடும்பத்தினர் கோரிக்கை விடுத்துள்ளனர்.குடும்ப சூழலுக்காக வெளிநாடு வேலைக்கு சென்று இளைஞர் மின்னல் தாக்கி உயிரிழந்த சம்பவம் அப்பகுதி மக்களிடையே சோகத்தை ஏற்படுத்தியுள்ளது.
புதுக்கோட்டை: புதுக்கோட்டை மாவட்டம் கீரமங்கலத்தில் சேதமடைந்துள்ள பிரமாண்ட சிவன் சிலை தடாகச்சுவற்றை சீரமைத்துர வேண்டுமென அப்பகுதி மக்கள் கோரிக்கை விடுத்துள்ளனர்.
கீரமங்கலத்தில் பழமை வாய்ந்த ஒப்பிலாமணி உடனுறை மெய்நின்றநாதர் கோயில் உள்ளது.இக்கோயிலில் சுமார் 10 ஆண்டுகளுக்கு முன்னர் கோயில் முன்புள்ள குளத்தின் நடுவில் 82 அடி உயர பிரமாண்ட சிவன் சிலை அமைக்கப்பட்டுள்ளது. மேலும், சுற்றுச்சுவர், தடுப்புச்சுவர், நடைபாதை அமைக்கப்பட்டது.
கோயிலுக்கு வரும் பக்தர்கள் நடை பாதை வழியாக சிவன் சிலையை சுற்றிப் பார்ப்பதுடன், தினசரி நூற்றுக்கணக்கானோர் நடைப்பயிற்சிக்காகவும் வந்து செல்கின்றனர்.மேலும், சிவராத்திரி உள்ளிட்ட தினங்களில் ஏராளமானோர் கிரிவலம் செல்கின்றனர்.
இந்நிலையில், உரிய பராமரிப்பு இல்லாததால் மழையால் தடாகச்சுவற்றில் விரிசல் ஏற்பட்டு சாய்ந்து விடும் நிலையில் உள்ளது.
நடை பாதை மற்றும் தடாகத்தின் சுற்றுச்சுவர் சேதமடைந்துள்ளதால் பக்தர்கள் அச்சத்துடனேயே சிவன் சிலையை சுற்றி வருகின்றனர்.
மேலும், தற்போது பருவமழை தொடங்கியுள்ளதால் குளத்தின் தடுப்புவர் மேலும் விரிசல் ஏற்படத் தொடங்கியுள்ளதால் உடனே சேதமடைந்த சுவற்றை சீரமைத்துத்தர நடவடிக்கை எடுக்க வேண்டும் என அப்பகுதி மக்கள் கோரிக்கை விடுத்துள்ளனர்.
(படம்)கீரமங்கலத்தில் மெய்நின்றநாதர் கோயிலில் அமைக்கப்பட்டுள்ள பிரமாண்ட சிவன்சிலை
புதுக்கோட்டை மாவட்டம் கீரமங்கலம் அருகேயுள்ள செரியலூர் கறம்பக்காடு முத்துமாரியம்மன் கோயில் தேரோட்டம் திங்கள்கிழமை மாலை நடைபெற்றது.
கீரமங்கலம் அருகேயுள்ள பிரசித்தி பெற்ற செரியலூர் கறம்பக்காடு முத்துமாரியம்மன் கோயில் திருவிழா கடந்த வாரம் காப்புக் கட்டுதலுடன் தொடங்கியது.தொடர்ந்து, மண்டகபடிதாரர்கள் சார்பில் கோயிலில் தினசரி அம்மனுக்கு சிறப்பு அபிஷேக ஆராதனைகள், வீதியுலா நிகழ்ச்சியும் நடைபெற்று வந்தன.திருவிழாவின் முக்கிய நிகழ்ச்சியான தேரோட்டம் திங்கள்கிழமை மாலை நடைபெற்றது. இதையொட்டி, சிறப்பு அலங்காரத்தில் காட்சியளித்த அம்மனை அலங்கரிக்கப்பட்ட தேரில் எழுந்தருளச் செய்து தேரோடும் வீதிகள் வழியே ஏராளமானோர் தேரை இழுத்து வந்தனர்.இதில் செரியலூர் கறம்பக்காடு, கீரமங்கலம் உள்ளிட்ட மாவட்டத்தின் பல்வேறு பகுதிகளில் இருந்து ஏராளமானோர் கலந்து கொண்டனர்.கீரமங்கலம் போலீஸார் பாதுகாப்பு பணிகளை மேற்கொண்டனர்.
புதுக்கோட்டை, ஜூன்: புதுக்கோட்டை மாவட்டத்தில் பொதுமக்கள், முன்களப் பணியாளர்களுக்கு கோவிட் நிவாரண உதவிகளை சட்டம், நீதிமன்றங்கள், சிறைச்சாலை மற்றும் ஊழல் தடுப்பு சட்ட அமைச்சர் எஸ். ரகுபதி வழங்கினார்.
புதுக்கோட்டை சாந்தாரம்மன் கோவில் நகரத்தார் மண்டபத்தில் வெள்ளிக்கிழமை நடைபெற்ற
கோவிட் தடுப்பூசி மருத்துவ முகாமினை .எஸ்.ரகுபதி வெள்ளிக்கிழமை(4.6.2021)துவக்கி வைத்து பார்வையிட்டார்.
பின்னர் அமைச்சர் ரகுபதி கூறியதாவது: கோவிட் நோய் தொற்றை கட்டுப்படுத்தும் வகையில் தமிழக அரசு மேற்கொண்டு வரும் போர்க்கால நடவடிக்கையின் காரணமாக கோவிட் நோய் தொற்று குறைந்து வருகிறது.
எனினும் கோவிட் நோய் தொற்றை மேலும் குறைக்க பல்வேறு நடவடிக்கைகள் மேற்கொள்ளப்பட்டு வருவதுடன் கோவிட் நோயாளிகள் தமிழகத்தில் இல்லை என்ற நிலையை உருவாக்குவதே முதல்வர் ஸ்டாலினின் நோக்கமாகும்.
அந்த வகையில் புதுக்கோட்டை மாவட்டத்திலும் கோவிட் நோயாளிகள் இல்லை என்ற நிலையை உருவாக்க தேவையான நடவடிக்கைகள் மேற்கொள்ளப்பட்டு வருகிறது. புதுக்கோட்டை மாவட்டத்தில் பல்வேறு பகுதிகளிலும் ஊராட்சி அளவில் பொதுமக்களுக்கு கோவிட் தடுப்பூசி போடப்பட்டு வருகிறது. பொதுமக்கள் அனைவரும் கோவிட் தடுப்பூசி போட்டு கொண்டால் மாவட்டத்தை கோவிட் தொற்றில்லாத மாவட்டமாக மாற்ற முடியும்.
பொதுமக்களின் உயிரை காப்பாற்றும் வகையில் தடுப்பூசியின் முக்கியத்துவம் குறித்து போதிய விழிப்புணர்வு ஏற்படுத்த வேண்டும். எனவே தடுப்பூசி முகாமை அனைத்து பொதுமக்களும் உரிய முறையில் பயன்படுத்தி கொள்ள வேண்டும். தமிழக அரசு கோவிட் தொற்றை கட்டுப்படுத்துவதில் முழு கவனம் செலுத்தி வருகிறது. எனவே, கோவிட் தொற்றை கட்டுப்படுத்த அனைவரும் ஒருங்கிணைந்து செயல்பட வேண்டும் என்றார் அமைச்சர் எஸ். ரகுபதி.
பின்னர் புதுக்கோட்டை நகராட்சி, தொண்டைமான்
நகர் மேல 6-ஆம் வீதி மற்றும் திருவப்பூர் தனியார் திருமண
மண்டபத்தில் பொதுமக்களுக்கு கோவிட் நிவாரண உதவியாக அரிசி வழங்கினார். மேலும்
கலீப் நகரில் எஸ்டிபிஐ சார்பில் ஆம்புலன்ஸ்
சேவையினையும் துவக்கி வைத்தார்.
பின்னர் அறந்தாங்கி அரசு மருத்துவமனை மற்றும் அறந்தாங்கி நகராட்சி ஆகிய இடங்களில் பணிபுரியும் முன்களப் பணியாளர்களுக்கும் கோவிட் நிவாரண பொருட்கள் மற்றும் பாதுகாப்பு உபகரணங்களை வழங்கினார். மேலும் அறந்தாங்கி ஆட்டோ ஸ்டாண்டில் உள்ள ஆட்டோ ஓட்டுநர்களுக்கும் கோவிட் நிவாரண உதவிகள் வழங்கினார்.
முன்னதாகபுதுக்கோட்டை மாவட்ட கட்டுமான பொறியாளர் சங்கம் சார்பில் முதலமைச்சரின் பொது நிவாரண நிதிக்கு கோவிட் நிவாரண நிதியாக ரூ.25,000க்கான காசோலையை நிர்வாகிகள் வழங்கினர்.
புதுக்கோட்டை, மார்ச்: புதுக்கோட்டையில் பாஜக நிர்வாகிகளுக்கு புதுக்கோட்டை தொகுதியில் போட்டியிடும் அதிமுக வேட்பாளர் அறிமுக விழா, ஆலோசனைக்கூட்டம் நடைபெற்றது.
புதுக்கோட்டை சட்டமன்ற தொகுதியில் அதிமுக, பாஜக, பாட்டாளி மக்கள் கட்சி மற்றும் தமிழ் மாநில காங்கிரஸ் உள்ளிட்ட கூட்டணி கட்சிகளின் சார்பில் பேட்டியிடும் அதிமுக வேட்பாளரான கார்த்திக் தொண்டைமான் கலந்து கொண்ட பாரதிய ஜனதா கட்சி நிர்வாகிகளுடன் அறிமுக கூட்டம் புதுக்கோட்டையிலுள்ள தனியார் ஹோட்டலில் பாரதிய ஜனதா கட்சி தேர்தல் பணிக்குழு அமைப்பாளர் ஜீவானந்தம் தலைமையில் நடைபெற்றது.
இக்கூட்டத்தில் பாரதிய ஜனதா கட்சியின் கூட்டணி கட்சி வேட்பாளர் வீ.ஆர்.கார்த்திக் தொண்டைமானுக்கு அதிகப்படியான வாக்கு வித்தியாசத்தில் வெற்றிபெற செய்ய அயராது பாடுபடுவது என்று கூட்டத்தில் தீர்மானிக்கப்பட்டது. இதில், அதிமுக நகர செயலாளர் க. பாஸ்கர், முன்னாள் நகர்மன்றத் துணைத் தலைவர் அப்துல் ரகுமான்மற்றும் பாரதிய ஜனதா கட்சி நகர பொதுச் செயலாளர் குமார் உள்ளிட்ட பொறுப்பாளர்கள் ஏராளமானோர் கலந்து கொண்டனர்
ஈரோடு, பிப்: பூத் கமிட்டியை வலுப்படுத்த வேண்டுமென மாநகர பாட்டாளி மக்கள் கட்சியின் சிறப்பு பொதுக்குழுக் கூட்டத்தில் வலியுறுத்தப்பட்டது.
ஈரோட்டில் நடந்த கூட்டத்துக்கு மாநில துணை பொதுச்செயலாளர் தா.ப. பரமேஸ்வரன் தலைமை வகித்தார். மாநில செயற்குழு உறுப்பினர் பொ.வை.ஆறுமுகம் முன்னிலை வகித்தார்.
ஈரோடு மாவட்டம் முழுவதும் பாட்டாளி மக்கள் கட்சி சார்பில் பூத் கமிட்டி வலுப்படுத்த வேண்டும். சட்டமன்றத் தேர்தலில் பாட்டாளி மக்கள் கட்சியின் நிறுவனர் டாக்டர் ராமதாஸ் கூட்டணி குறித்து எடுக்கும் முடிவுக்கு அனைவரும் கட்டுப்பட்டு வெற்றிக்காக பாடுபட வேண்டும் என்பன உள்ளிட்ட பல்வேறு தீர்மானங்கள் நிறைவேற்றப்பட்டன.
கூட்டத்தில், மாநகரச் செயலாளர் எஸ் .ஆர். ராஜ், கருங்கல்பாளையம் ராஜேந்திரன், மாநில துணை அமைப்பு செயலாளர் ராஜேந்திரன்,மாவட்ட அமைப்புச் செயலாளர் முருகன், உழவர் பேரியக்கம் பெருமாள், எலவமலை ஊராட்சி மன்ற தலைவர் வைத்தியநாதன், துணைச் செயலாளர்கள் ரமேஷ் கணேஷ், முன்னாள் மாவட்ட செயலாளர் முத்துகுமார், வன்னியர் சங்க மாவட்டச் செயலாளர் செல்வராஜ், தொழிற்சங்க தலைவர் ராஜேந்திரன், மகளிர் அணி நிர்வாகிகள் முத்துலட்சுமி, அய்யம்மாள் உட்பட பலர் கலந்து கொண்டனர். முன்னதாக மத்திய மாவட்ட செயலாளர் பிரபு வரவேற்றார். நகர மாவட்ட செயலாளர் ராசு நன்றி கூறினார்.
புதுக்கோட்டை மாவட்டத்தில் விதி முறைகளுக்கு மாறாக எலி பேஸ்ட் விற்பனை செய்த 50-க்கும் மேற்பட்ட மளிகை கடை உரிமையாளர்கள் மீது போலீசார் வழக்கு பதிவு செய்து கடைகளில் விற்பனைக்காக வைக்கப்பட்டிருந்த 500க்கும் மேற்பட்ட எலிபேஸ்ட் பாக்கெட்டுக்களையும் பறிமுதல் செய்துள்ளனர்.
விவசாயிகளுக்கான மருந்து கடைகளில் மட்டுமே எலி பேஸ்ட் விற்பனை செய்ய வேண்டுமென விதிமுறைகள் உள்ள நிலையில் சாதாரண மளிகைக் கடைகள் மற்றும் பெட்டிக்கடைகளில் எலி பேஸ்ட் விற்பனை செய்யப்படுவதால் அதனை எளிதாக வாங்கி தற்கொலை செய்துகொள்ள முயற்சி செய்பவர்களின் எண்ணிக்கை அதிகரித்துள்ளது.
இந்நிலையில், மாவட்ட காவல் கண்காணிப்பாளர் அருண்சக்தி குமாரின் உத்தரவின்பேரில், புதுக்கோட்டை மாவட்டத்தில் பல்வேறு பகுதிகளில் உள்ள மளிகை மற்றும் பெட்டிக் கடைகளில் போலீசார் அதிரடி சோதனையில் ஈடுபட்டனர். அப்போது, விதிகளை மீறி எலி பேஸ்ட் விற்பனை செய்த 50-க்கும் மேற்பட்ட மளிகை கடைகளின் உரிமையாளர்கள் மீது போலீசார் வழக்கு பதிவு செய்துள்ளனர். மேலும்,கடைகளில் இருந்து 500-க்கும் மேற்பட்ட எலி பேஸ்ட் பாக்கெட்டுகளை பறிமுதல் செய்துள்ளனர்.
