கறம்பக்குடி அருகே 1 டன் ரேசன் அரிசி பறிமுதல்: ஒருவர் கைது

புதுக்கோட்டை:புதுக்கோட்டை மாவட்டம், கறம்பக்குடி அருகே ரேசன் அரிசியை பதுக்கி வைத்து விற்பனையில் ஈடுபட்டவரை புதன்கிழமை போலீஸார் கைது செய்தனர்.

 கறம்பக்குடி அருகேயுள்ள வெட்டன்விடுதி பகுதியில் ரேசன் அரிசி பதுக்கி வைக்கப்பட்டு அதிக விலைக்கு விற்பனை நடைபெறுவதாக கிடைத்த தகவலைத் தொடர்ந்து, புதுக்கோட்டை மாவட்ட குடிமைப் பொருள் வழங்கல் குற்றப் புலனாய்வுத்துறை காவல் உதவி ஆய்வாளர் கார்த்திக் தலைமையிலான போலீஸார் அப்பகுதியில் தீவிர கண்காணிப்பில் ஈடுபட்டனர். அப்போது, வெட்டன்விடுதி பூக்காரத் தெருவைச் சேர்ந்த எஸ்.ஆனந்தகுமார்(45) என்பவரது வீட்டில் 22 மூட்டைகளில் சுமார் 1 டன் ரேசன் அரிசி பதுக்கி வைக்கப்பட்டிருந்தது தெரியவந்தது. தொடர்ந்து, அரிசி மூட்டைகள், பதிவு எண் இல்லாத மொபட் ஆகியவற்றை பறிமுதல் செய்ததோடு, ஆனந்தகுமாரை கைது செய்து விசாரணை மேற்கொண்டுவருகின்றனர்.

மேற்பனைக்காடு வீரமாகாளியம்மன் கோயில் பாளையெடுப்புத் திருவிழா

புதுக்கோட்டை: புதுக்கோட்டை மாவட்டம், கீரமங்கலம் அருகேயுள்ள மேற்பனைக்காடு வீரமாகாளியம்மன் கோயில் பாளையெடுப்புத் திருவிழா புதன்கிழமை நடைபெற்றது.

 கீரமங்கலம் அருகேயுள்ள பிரசித்தி பெற்ற வீரமாகாளியம்மன் கோயில் திருவிழா கடந்தவாரம் காப்புக் கட்டுதலுடன் தொடங்கியது. தொடர்ந்து, கோயிலில் தினசரி அம்மனுக்கு சிறப்பு அபிஷேக ஆராதனைகளும் அம்மனே வீதியுலா நிகழ்ச்சியும் நடைபெற்றுவந்தன.கடந்த வாரம் முளைப்பாரித் திருவிழாவும் நடைபெற்றது. திருவிழாவின் முக்கிய நிகழ்ச்சியான பாளையெடுப்புத் திருவிழா புதன்கிழமை நடைபெற்றது. இதையொட்டி, அப்பகுதி பெண்கள் குடங்களில் நெல்மணிகளை நிரப்பி, தென்னம்பாளைகளை வைத்து மலர்களால் அலங்கரித்த குடங்களை சுமந்தவாறு வாணவேடிக்கைகள், மேளதாளங்கள் முழங்க ஊர்வலமாகச்சென்று கோயிலை அடைந்தனர். தொடர்ந்து, கோயில் அருகே தென்னம்பாளைகளை வைத்துவிட்டு சிறப்பு வழிபாட்டில் ஈடுபட்டனர். தொடர்ந்து, அம்மனுக்கு பல்வேறு திரவிய அபிஷேக ஆராதனைகள் நடைபெற்றன.

 திருவிழாவில், மேற்பனைக்காடு, செரியலூர், கீரமங்கலம் உள்ளிட்ட பகுதிகளைச் சேர்ந்த ஏராளமானோர் கலந்துகொண்டனர். கீரமங்கலம் போலீஸார் பாதுகாப்பு பணிகளை மேற்கொண்டனர்.

செய்தியாளர் தாக்கப்பட்டதைக் கண்டித்து: புதுக்கோட்டையில் பத்திரிகையாளர் சங்கத்தினர் ஆர்ப்பாட்டம்

புதுக்கோட்டை:திருப்பூர் மாவட்டம், பல்லடம் நியூஸ் 7 செய்தியாளர் மீது நடத்தப்பட்ட கொலைவெறித் தாக்குதலைக் கண்டித்து புதுக்கோட்டை மாவட்ட பத்திரிகையாளர் சங்கத்தினர் சனிக்கிழமை ஆர்ப்பாட்டத்தில் ஈடுபட்டனர்.

புதுக்கோட்டை பேருந்து நிலையம் அருகே புதுக்கோட்டை மாவட்ட பத்திரிகையாளர் சங்கத் தலைவர் சு.மதியழகன் தலைமையில் நடைபெற்ற ஆர்ப்பாட்டத்தில்,திருப்பூர் மாவட்டம், பல்லடம் நியூஸ் 7 செய்தியாளர் நேசபிரபு மீது நடத்தப்பட்ட கொலைவெறித்தாக்குதலை கண்டித்தும், தாக்குதலில் ஈடுபட்டவர்கள் மீது கடும் நடவடிக்கை எடுக்க  வலியுறுத்தியும், அரசும், காவல்துறையும் செய்தியாளர்களின் பாதுகாப்பை உறுதி செய்ய வேண்டுமென வலியுறுத்தி முழக்கங்கள் எழுப்பினர்.

புதுக்கோட்டை மாவட்ட பத்திரிகையாளர் சங்கச்செயலர் சா.ஜெயப்பிரகாஷ், பொருளாளர் கே.சுரேஷ் உள்ளிட்டோர் கண்டன உரையாற்றினர்.

கறம்பக்குடி அருகே குடிநீர் கோரி கிராம மக்கள் சாலை மறியல்

புதுக்கோட்டை: புதுக்கோட்டை மாவட்டம், கறம்பக்குடி அருகே குடிநீர் வழங்க வலியுறுத்தி கிராம மக்கள்  சாலை மறியலில் ஈடுபட்டனர்.

 கறம்பக்குடி அருகேயுள்ள செங்கமேடு ஊராட்சி கண்ணுத்தோப்பு கிராமத்தில் சுமார் 300-க்கும் மேற்பட்ட குடும்பத்தினர் வசித்துவருகின்றனர். அவர்களுக்கு அப்பகுதியில் உள்ள மேல்நிலைநீர்தேக்கத் தொட்டி மூலம் குடிநீர் விநியோகிக்கப்பட்டு வந்துள்ளது. இந்நிலையில், அந்த மேல்நிலைநீர்தேக்க தொட்டியின் மின்மோட்டார் சிலமாதங்களு்கு முன்பு பழுதாகியுள்ளது. அதனால், அப்பகுதி மக்களுக்கு குடிநீர் விநியோகம் தடைபட்டுள்ளது. இதுகுறித்து பலமுறை ஊராட்சி நிர்வாகத்திடம் முறையிட்டும் நடவடிக்கை எடுக்கவில்லையாம்.இதனால், அப்பகுதி மக்கள் உடனே குடிநீர் வழங்க வலியுறுத்தி, காலிக்குடங்களுடன் கறம்பக்குடி ஊராட்சி ஒன்றிய அலுவலகம் அருகே சாலை மறியலில் ஈடுபட்டனர். தொடர்ந்து, அவர்களிடம் ஒன்றிய அலுவலர்கள், கறம்பக்குடி போலீஸார் பேச்சுவார்த்தை நடத்தி குடிநீர் வழங்க உரிய நடவடிக்கை எடுப்பதாக அளித்த உறுதியளிப்பை ஏற்று போராட்டத்தில் ஈடுபட்டோர் கலைந்து சென்றனர்.இந்த மறியல் போராட்டத்தால் கறம்பக்குடி-புதுக்கோட்டை சாலையில் சுமார் 1 மணி நேரம் போக்குவரத்து பாதிக்கப்பட்டது.

ஆலங்குடியில் தலைமைக் காவலரை தாக்கிய இளைஞர் கைது

புதுக்கோட்டை மாவட்டம், ஆலங்குடியில் தலைமை காவலரை தாக்கிய இளைஞரை போலீஸார் கைது செய்தனர்.
   ஆலங்குடி அரசுமரம் பேருந்து நிறுத்தத்தில் இளைஞர் ஒருவர் போதையில் ரகளையில் ஈடுபடுவதாக தகவல் கிடைத்துள்ளது.  இதைத்தொடர்ந்து, காவலர் ஒருவருரோடு தலைமைக்காவலர் ராமையா  அங்கு சென்றுள்ளார். அப்போது, ஆலங்குடி பள்ளி வாசல் தெருவைச் சேர்ந்த கொலை வழக்கு உள்ளிட்ட பல்வேறு வழக்குகளில் தொடர்புடைய அ.முஸ்தபா(26).  அங்கு நின்றவர்களிடம் போதையில் தகராறில் ஈடுபட்டுள்ளார். அவரை அங்கிருந்து செல்லுமாறு தலைமை காவலர் ராமையா கூறியுள்ளார். இதை ஏற்காமால் அவரிடம் தகராறில் ஈடுபட்டதோடு, ராமையாவை கீழே தள்ளி தாக்கியுள்ளார். இதைத்தொடர்ந்து, அங்கு சென்ற போலீஸார் முஸ்தபாவை  கைது செய்து , நீதிமன்றத்தில் ஆஜர்படுத்தி சிறையில் அடைத்தனர்.

நீட் தேர்வு பயிற்சி வகுப்புகள் சில நாள்கள் தொடங்கப்படும்: அமைச்சர் கே.ஏ.செங்கோட்டையன் தகவல்

ஈரோடு:   நீட் தேர்வுக்கான பயிற்சி வகுப்புகள் ஆன்லைன் மூலம் அடுத்த சிலநாள்களில் தொடங்கப்படும் என்றார் தமிழகத பள்ளிக்கல்வித்துறை அமைச்சர் கே.ஏ. செங்கோட்டையன்.

ஈரோடு மாவட்டம், கோபிச்செட்டிபாளையம் சட்டமன்ற தொகுதிக்குள்பட்ட லக்கம்பட்டி பேரூராட்சியில் ரூ.1.70 கோடி மதிப்பிலான 3 லட்சம் லிட்டர்ர் கொள்ளளவு கொண்ட குடிநீர் தொட்டி கட்டும் பணிக்கு பூமி பூஜையை தொடக்கி வைத்து செய்தியாளர்களிடம் மேலும் கூறியதாவது:

நீட் தேர்வு பயிற்சி வகுப்புகள் விரைவில் தொடங்கப்படும். நேற்று முன்தினம் வரை 9 ஆயிரத்து 848 பேர் பயிற்சிக்காக பதிவு செய்திருந்தனர். தொடர்ந்து நேற்று கூடுதலாக 20 ஆயிரம் மாணவர்கள் பயிற்சிக்காக பதிவு செய்துள்ளனர்.

இது எந்த அளவுக்கு அரசுப் பள்ளி மாணவர்களிடையே நீட் தேர்வுக்கு தேர்ச்சி பெற வேண்டும் மருத்துவராக வேண்டும் என்ற  ஊக்கத்த்தையும் விழிப்புணர்வையும் உருவாகியுள்ளது என்பதை வெளிப்படுத்தியுள்ளது.

நேற்று தமிழக ஆளுநர்  அரசு பள்ளி மாணவ மாணவியருக்கு மருத்துவக்கல்லூரிகளில் 7.5 சதவீத இட ஒதுக்கீட்டு மசோதாவுக்கு  அனுமதி அளித்துள்ளார். இதில் தமிழக முதலமைச்சரை பாராட்டியுள்ளார். இந்த அரசு சட்டத்தின் மூலம் 303 அரசு பள்ளி மாணவர்கள் மருத்துவம் படிக்க வாய்ப்பு ஏற்பட்டுள்ளது.

கடந்த ஆண்டுடன் ஒப்பிடுகையில் நடப்பாண்டு 5.25 லட்சம் மாணவ, மாணவிகள் அரசு பள்ளியில் கூடுதலாகச் சேர்ந்துள்ளனர். தற்பொழுதுள்ள சுற்றுச்சூழலில் பள்ளிகள் திறக்க வாய்ப்பில்லை. திறந்தவெளியில் பள்ளிகளை நடத்தினால் மாணவ மாணவிகள் வெயிலிலும் பனியிலும் பாதிக்கப்படுவார்கள். எனவே அதற்கான வாய்ப்பு இல்லை.

லக்கம்பட்டி பேரூராட்சியில் ரூ.13.74 கோடி மதிப்பிலான வளர்ச்சிப் பணிகள் இதுவரை நடந்துள்ளன. மேலும், ரூ.5 கோடி மதிப்பிலான பணிகள் நடைபெற்று வருகின்றன. 1,500 குடும்பங்களுக்கு குடிநீர் இணைப்பு ஏற்கெனவே வழங்கப்பட்டுள்ளது. மேலும், 1,700 பேருக்கு இணைப்பு வழங்கப்படும்.

பேரூராட்சி பகுதியில் உள்ள எல்லாம்காட்டு பாளையம் பகுதியில் ரூ.25 லட்சம் மதிப்பிலான சுகாதார துணை நிலையம்  ஒன்று திறக்கப்பட்டுள்ளது என்றார் அமைச்சர் செங்கோட்டையன். இதில், கோபி கோட்டாட்சியர் ஜெயராமன், ஒன்றிய செயலாளர் மனோகரன், நம்பியூர் ஒன்றிய செயலாளர் தம்பி என்கிற சுப்ரமணியம், மாவட்ட பால்வளத் தலைவர் காளியப்பன் உள்பட பலர் கலந்து கொண்டனர். 

கொரோனா தடுப்பூசியின் 2 டோஸுக்கான விலை ரூ. 1000...

புது தில்லி: கொரோனாவிற்கான தடுப்பூசி பொதுமக்களுக்கு ஏப்ரல் மாதத்தில் கிடைக்கலாம் என்று கூறப்படும் நிலையில், இரண்டு டோஸ் கொரோனா மருந்துக்கான விலைரூ.1000 என சீரம் இன்ஸ்டிடியூட் ஆப் இந்தியாவின் தலைமை நிர்வாக அதிகாரி ஆதார் பூனவல்லா கூறியுள்ளார்.

உலகையே அச்சுறுத்தி வரும் கொரோனாவை கட்டுப்படுத்துவதற்கு உலகின் பல்வேறு நாடுகளும், தடுப்பூசி கண்டுபிடிப்பதில் தீவிரம் காட்டி வருகின்றன. ஒரு சில நாடுகளில் தடுப்பூசியின் பரிசோதனை இறுதிகட்டத்தில் உள்ளது. இதனால் அடுத்த ஆண்டில் கொரோனாவிற்கான தடுப்பூசி கிடைத்துவிடும் என்று கூறப்படுகிறது.

இந்நிலையில், சீரம் இன்ஸ்டிடியூட் ஆப் இந்தியாவின் தலைமை நிர்வாக அதிகாரி ஆதார் பூனவல்லா இது குறித்து கூறும்போது, எல்லாம் திட்டமிட்டபடி நடந்தால் இன்னும் 3-4 மாதங்களில் கொரோனா தடுப்பு மருந்து இந்தியர்களுக்கு கிடைக்கும் என்று கூறியுள்ளார். மேலும், அவர் தற்போது வேக்சின் உற்பத்தி வேகமாக நடந்து வருகிறது. டிசம்பர் மாதத்திற்குள் வேக்சின் கிடைக்க வாய்ப்பு இல்லை.

எல்லாம் திட்டப்படி நடந்தால் அடுத்த வரும் பிப்ரவரி மாதத்திற்குள் வேக்சின் கிடைத்துவிடும். பின் மார்ச், ஏப்ரல் மாதங்களில் மக்களுக்கு வேக்சின் கொடுக்க முடியும். தொடக்கத்தில் வயதானவர்கள், கர்ப்பிணிகள், முன் கள பணியாளர்கள் ஆகியோருக்கு வேக்சின் கொடுக்க முடியும். ஆனால் இதற்கு எல்லாம் திட்டமிட்டபடி நடக்க வேண்டும்.

பொதுமக்களுக்கு ஏப்ரல் மாதத்தில் கிடைக்கலாம். இந்த தடுப்பூசிகள் நீண்ட காலத்திற்கு உங்களைப் பாதுகாக்கப் போகிறதா என்பதை காலம் மட்டுமே சொல்லும். இதில் இரண்டு டோஸ் கொரோனா மருந்து அதிகபட்சம் 1000 என்ற விலையில் கிடைக்கும். அனைவருக்கும் 2024-ஆம் ஆண்டில் தடுப்பூசி கிடைத்துவிடும் என்று தெரிவித்துள்ளார்.