ரூ.5 லட்சம் சொந்த நிதியில் அரசுப்பள்ளியை மேம்படுத்த களமிறங்கிய கிராம மக்கள்: முன்மாதிரியாக திகழும் பள்ளியை பார்வையிட்டு ஆலோசனை

புதுக்கோட்டை: புதுக்கோட்டை மாவட்டம் ஆலங்குடி  அருகே பனசக்காடு அரசுத்தொடக்கப்பள்ளியை ரூ.5 லட்சம் சொந்த நிதியில் மேம்படுத்த முடிவு செய்த கிராம மக்கள், முன்மாதிரியாக திகழும் புள்ளாச்சிகுடியிருப்பு அரசுப்பள்ளியை திங்கள்கிழமை பார்வையிட்டு,ஆலோசனை மேற்கொண்டனர்.

   ஆலங்குடி அருகேயுள்ள கொத்தமங்கலம் ஊராட்சிக்கு உள்பட்ட பனசக்காடு அரசு தொடக்கப்பள்ளியை மேம்படுத்துவதற்கு கிராம மக்கள் முடிவு செய்தனர். அதற்கான ஆலோசனைக்கூட்டம் பள்ளி வளாகத்தில் ஞாயிற்றுக்கிழமை மாலை நடைபெற்றது. கூட்டத்துக்கு, அரசு மருத்துவர் எஸ்.அருள் தலைமை வகித்தார்.லெ.அடைக்கலம், ஆனந்தன் ஆகியோர் முன்னிலை வகித்தனர். கூட்டத்தில், பள்ளி, அங்கன்வாடி கட்டடத்தின் சேதமடைந்த பகுதிகளை சீரமைத்து,வர்ணம் பூசி,  இரு வகுப்பறைகளையும் ஏசி வசதியுடன் ஸ்மார்ட் வகுப்பறையாக மாற்றுவது, மாணவர்கள் அமர்ந்து சாப்பிடும் வகையில்  கட்டடம் கட்டுவது, விளையாட்டு உபகரணங்கள், கணினிகள்,சோலார் இன்வெர்ட்டர், குடிநீர் வசதிகளை மேம்படுத்துவது என்பன உள்ளிட்ட பணிகளை சொந்த நிதி, கொடையாளர்களின் உதவியுடன் மேற்கொள்வது. மேலும், பள்ளிக்கு சுற்றுச்சுவர், பேவர்பிளாக் தளம், சிறுவர் பூங்கா உள்ளிட்டவைகளை அரசுநிதி மூலம் பெறுவதற்கு முயற்சிகள் மேற்கொள்வது என்பன உள்ளிட்ட தீர்மானங்கள் கூட்டத்தில் நிறைவேற்றப்பட்டன.தொடர்ந்து,பள்ளியின் வளர்ச்சிப் பணிகளை மேற்கொள்ள திட்டமிட்ட கிராமத்தினர், இதுபோன்று பள்ளியை ஏற்கனவே ஸ்மார்ட் வகுப்பறையுடன், பேவர் பிளாக் தளம், கலையரங்கம் உள்ளிட்ட வசதிகளுடன் மேம்படுத்தி முன்மாதிரியாக திகழும் புள்ளாச்சி குடியிறுப்பு அரசுத்தொடக்கப்பள்ளியை பனசக்காடு பள்ளியின் ஆசிரியைகள், கிராம மக்கள், பெற்றோர்கள் திங்கள்கிழமை பார்வையிட்டனர். பள்ளியின் தோற்றம் , ஸ்மார்ட் வகுப்பறையை பார்வையிட்டு, அப்பள்ளியின் ஆசிரியர்கள், பெற்றோர் ஆசிரியர் கழகத் தலைவர் சுரேஷ் உள்ளிட்டோரை சந்தித்து, பள்ளியில் மேற்கொள்ளப்பட்டுள்ள பணிகள், செலவீனங்கள், வசதிகள், அரசு நிதி பெறும் வழிமுறைகள் உள்ளிட்டவைகள் குறித்து ஆலோசனை மேற்கொண்டனர்.

கால் நூற்றாண்டு பாதை பிரச்சினைக்கு தீர்வு:கோட்டாட்சியருக்கு பொதுமக்கள் பாராட்டு

புதுக்கோட்டை: புதுக்கோட்டை மாவட்டம் கறம்பக்குடி அருகே கால் நூற்றாண்டாக இருந்த வந்த பாதை பிரச்சினைக்கு தீர்வு கண்ட புதுக்கோட்டை கோட்டாட்சியர் முருகேசனை அப்பகுதி பொதுமக்கள் பாராட்டினர்.
  கறம்பக்குடி வட்டம் அம்புக்கோவில் ஊராட்சியில் கண்டியன்பட்டி ஆதிதிராவிடர் தெரு உள்ளது. இங்கிருந்து கல்லாக்கோட்டை ஊராட்சியில் உள்ள ஆண்டான் தெரு வரை சுமார் 2.5 கிலோ மீட்டருக்கு பாதை ஆக்கிரமிக்கப்பட்டு இருந்தது. வேளாண் விளை பொருட்களை கொண்டு செல்லவும், மயானத்துக்கு செல்லவும் இப்பகுதியினர் மிகுந்த சிரமத்தைச் சந்தித்து வந்தனர். பாதையில் உள்ள ஆக்கிரமிப்புகளை அகற்றித் தர வேண்டும் என பல முறை அரசுக்கு கோரிக்கை விடுத்தும், அவ்வப்போது போராட்டங்களை நடத்தியும்கூட தீர்வில்லை.
இந்நிலையில், இதுதொடர்பாக புதுக்கோட்டை கோட்டாட்சியர் முருகேசனிடம் அப்பகுயினர் அண்மையில் கோரிக்கை மனுவை அளித்தனர். இது குறித்து சம்பந்தப்பட்டோரை அழைத்து பேச்சுவார்த்தை நடத்தினார். அதில், தீர்வு ஏற்படவில்லை.

இந்நிலையில், கோட்டாடஅசியர் முருகேசன் முன்னிலையில் போலீஸார் பாதுகாப்புடன்  பொக்லைன் இயந்திரங்களைக் கொண்டு சுமார் 2.5 கிலோ மீட்டருக்கு ஆக்கிரமிப்பு அகற்றப்பட்டது. கால் நூற்றாண்டாக நீடித்து வந்த பாதை பிரச்சினைக்கு தீர்வு கண்ட புதுக்கோட்டை கோட்டாட்சியர் முருகேசனை அப்பகுதியினர் வெகுவாக பாராட்டினர்.

தொடர் மழையால் நீர்வரத்து அதிகரிப்பு: செம்பரம்பாக்கம், புழல் ஏரிகளில் இருந்து வினாடிக்கு 100 கன அடி நீர் திறப்பு:

தொடர் மழையால் நீர்வரத்து அதிகரித்துள்ள நிலையில் செம்பரம்பாக்கம், புழல் ஏரிகளில் இருந்து தண்ணீர் திறக்கப்பட்டுள்ளது. சென்னை மற்றும் புறநகர் பகுதிகளில் கடந்த சில நாட்களாக தொடர்ந்து கன மற்றும் மிதமான மழை பெய்து வருகிறது. இதனால் சென்னை நகர மக்களுக்கு குடிநீர் வழங்கும் புழல் மற்றும் செம்பரம்பாக்கம் ஏரிகள் முழு கொள்ளளவை எட்டி வருகின்றன. இந்நிலையில், இன்று காலை முதல் ஆங்காங்கே கனமழையும், மிதமான மழையும் பெய்து வருகிறது. இன்று காலை நிலவரப்படி, செம்பரம்பாக்கம் ஏரியில் மொத்த கொள்ளளவான 24 அடியில், தற்போது 20.65 அடியாக நீர் இருப்பு உள்ளது.

புழல் ஏரியில் மொத்த கொள்ளளவான 3300 மில்லியன் கன அடியில், தற்போது 2692 மில்லியன் கன அடி நீர் நிரம்பியுள்ளது. இதைத்தொடர்ந்து, இன்று காலை முதல் புழல், செம்பரம்பாக்கம் ஏரிகளில் நீர்வரத்து அதிகரிக்கும்போது, முதல் கட்டமாக மாலை 100 கனஅடி உபரி நீரை வெளியேற்றும்படி மாவட்ட கலெக்டர்கள் ஆர்த்தி, ஆல்பி ஜான் வர்க்கீஸ் ஆகியோர் உத்தரவிட்டுள்ளனர். அதன் அடிப்படையில் செம்பரம்பாக்கம் புழல் ஏரிகளில் இருந்து தலா 100 கன அடி தண்ணீர் திறக்கப்பட்டுள்ளது. மேலும் உபரி நீர் வரத்து அதிகரிப்புக்கு ஏற்ப வெளியேற்றப்படும் நீரின் அளவை அதிகரிகத்து கொள்ளலாம் என பொதுப்பணி மற்றும் நீர்வளத்துறை அதிகாரிகள் முடிவு செய்துள்ளனர்.

4 மாவட்டங்களில் கூட்டுறவு ரேஷன் கடைகளுக்கு 1043 ஊளியர்கள் நேரடியாக நியமனம்-ஆன்லைனில் விண்ணப்பிக்க வேண்டும்:

   விண்ணப்பங்கள் இணையதளம் வழியாக பெறப்படுகின்றன. நவம்பர் 14-ம் தேதி மாலை 5.45 மணிக்குள் விண்ணப்பிக்க அவகாசம் கொடுக்கப்பட்டுள்ளது.

கூட்டிறவு சங்கங்கள் மூலம் நடத்தப்படும் நியாயவிலைக்கடைகளில் விற்பனையாளர் மற்றும் கட்டுனர் பணியிடங்கள் காலியாக உள்ளன. அந்த இடங்களை நிரப்ப கூட்டுறவு துறை அமைச்சர் ஐ.பெரியசாமி நடவடிக்கை எடுத்துள்ளார். அதன் அடிப்படையில் சென்னை, காஞ்சிபுரம், திருவள்ளூர், செங்கல்பட்டு மாவட்டங்களில் உள்ள ரேசன் கடைகளுக்கு ஊழியர்கள் தேர்வு செய்யப்படுகிறார்கள்.

4 மாவட்டங்களிலும் மொத்தம் 1043 பேர் பணியில் நியமிக்கப்பட இருக்கிறார்கள். இந்த பணிகளுக்கு குறைந்தபட்ச கல்வி தகுதி, வயது வரம்பு, இட ஒதுக்கீடு விண்ணப்ப கட்டணம் போன்ற விவரங்கள் மாவட்ட ஆள் சேர்ப்பு நிலைய இணையதளத்தில் வெளிடப்பட்டு உள்ளன.

சென்னை மாவட்டத்தில் 48 விற்பனையாளர்கள் 296 கட்டுனர் பணியிடங்கள், காஞ்சிபுரம் மாவட்டத்தில் 114 விற்பனையாளர், 160 கட்டுனர்கள், செங்கல்பட்டு மாவட்டத்தில் 157 விற்பனையாளர் 21 கட்டுனர்கள், திருவள்ளூர் மாவட்டத்தில் 198 விற்பனையாளர்கள், 39 கட்டுனர் பணியிடங்கள் நேரடியாக நிரப்பப்படுகின்றன.

விண்ணப்பங்கள் இணையதளம் வழியாக பெறப்படுகின்றன. அடுத்த மாதம் (நவம்பர்) 14-ந் தேதி மாலை 5.45 மணிக்குள் விண்ணப்பிக்க அவகாசம் கொடுக்கப்பட்டுள்ளது. அதற்கான அறிவிப்பு இன்று வெளியிடப்பட்டுள்ளது.

சாலையோரம் முகாமிட்டுள்ள காட்டு யானைகளை படம்பிடித்த வாகன ஓட்டிகளுக்கு வனத்துறையினர் எச்சரிக்கை

ஈரோடு, ஆக: ஈரோடு மாவட்டம் சத்தியமங்கலம் புலிகள் காப்பக வனப்பகுதியில் சாலையோரம் முகாமிட்டுள்ள காட்டு யானைகளை படம்பிடித்த வாகன ஓட்டிகளை   வனத்துறையினர் எச்சரித்து அனுப்பி வைத்தனர்.

சத்தியமங்கலம் புலிகள் காப்பக வனப்பகுதியில் யானை, புலி, சிறுத்தை, மான், கரடி, காட்டெருமை உள்ளிட்ட பல்வேறு வகையான வன விலங்குகள் வசிக்கின்றன. இந்த வனப்பகுதி வழியாக அமைந்துள்ள சத்தியமங்கலம்- மைசூர் தேசிய நெடுஞ்சாலை தமிழக-கர்நாடக மாநிலங்களை இணைக்கும் முக்கிய போக்குவரத்து வழித்தடமாக அமைந்துள்ளது. காட்டு யானைகள் வனப்பகுதியில் இருந்து வெளியேறி தேசிய நெடுஞ்சாலையில் பகல் நேரங்களில் சுற்றி திரிவதோடு சாலையோர வனப்பகுதியில் முகாமிட்டபடி தீவனம் உட்கொள்கின்றன.

இந்நிலையில்  ஆசனூர் அருகே காட்டுயானைகள் சாலையோரம் முகாமிட்டு தீவனம் உட்கொண்டிருந்தன. அப்போது அந்த வழியாக  சென்ற வாகன ஓட்டிகள் சிலர் யானைகளை கண்டதும் வாகனத்தை நிறுத்தி விட்டு கீழே இறங்கி காட்டு யானைகளின் அருகே சென்று ஆபத்தை உணராமல் செல்போன்களில் செல்பி மற்றும் புகைப்படங்கள் எடுத்தனர். காட்டுயானைகள் திடீரென மனிதர்களை தாக்கும் வாய்ப்பு உள்ளதை அறிந்தும் அதைப்பற்றி கவலைப்படாமல் வாகன ஓட்டிகள் கூட்டமாக யானைகளின் அருகே சென்று செல்பி மற்றும் வீடியோ எடுத்தனர்.

 இதனை அந்த வழியாக சென்ற  மற்ற வாகன ஓட்டிகள் கண்டு அதிர்ச்சி அடைந்தனர். இது குறித்து வனத்துறையினருக்கு தகவல் தெரிவிக்கப்பட்டது. சம்பவ இடத்திற்கு சென்ற வனத்துறையினர் செல்பி எடுத்துக் கொண்டிருந்த வாகன ஓட்டிகளை எச்சரித்தனர்.

யானை உள்ளிட்ட வனவிலங்குகள் அருகே சென்று செல்பி மற்றும் புகைப்படம் எடுக்கக்கூடாது என ஆங்காங்கே விழிப்புணர்வு வாசகங்கள் அடங்கிய பதாகைகள் வைத்தும் வாகன ஓட்டிகள் வனவிலங்குகளின் அருகே சென்று புகைப்படம் எடுப்பதாகவும் இதுபோன்ற செயல்களில் ஈடுபடுபவர்கள் மீது கடுமையான நடவடிக்கை எடுக்கப்படும் என வனத்துறையினர் தெரிவித்துள்ளனர்.

உலக அறிவியல் தினத்தையொட்டி சுற்றுச்சூழலை பாதுகாக்க ஆயிரம் மரங்களைநடவு செய்த இளைஞர்கள்

ஈரோடு பிப்; ஈரோடு மாவட்டம், கோபிசெட்டிபாளையம் அருகே உள்ள வெள்ளாங்கோயில் சில்லாமடை பகுதியில் உலக அறிவியல் தினத்தையொட்டி சுற்றுச்சூழலை பாதுகாக்க ஆயிரம் மரங்களை கிராமத்து இளைஞர்கள்  அந்த ஊர்பொதுமக்கள் ஒத்துழைப்புடன் நடவு செய்து வியப்பில் ஆழ்த்தியுள்ளனர்.

நோபல் பரிசு வென்ற இயற்பியல் விஞ்ஞானி சர் சி வி இராமன் இராமன் விளைவு கண்டுபிடித்ததை நினைகூரும் விதமாக பிப்ரவரி 28-ஆம் தேதி ஆண்டு தோறும் தேசிய அறிவியல் தினமாகக் கொண்டாடப்படுகிறது.  இந்நாளில் சுற்றுச்சூழலை பாதுகாக்கவும் புவி வெப்பமயமாவதை தடுக்கவும் பல்வேறு நிகழ்வுகளை பலர் மேற்கொண்டு வருகின் றனர். 

அதன் ஒரு பகுதியாக ஈரோடுமாவட்டம் கோபிசெட்டிபாளையம் அருகே உள்ள வெள்ளாங்கோயில் ஊராட்சி சில்லாமடை என்னும் கிராமத்தில் மின் போதி அறக்கட்டளையுடன் இணைந்த கிராமத்து இளைஞர்கள் மற்றும் ஊர் பொதுமக்கள் கிராம பகுதியில் சுற்றுச்சூழலை பாதுகாக்கும் விதமாக கிராமம் முழுவதும் ஆயிரம் மரங்களை நடவு செய்யும் முயற்சியில் ஈடுபட்டு கிராம மக்களின் ஒத்துழைப்புடன் கிராமப்பகுதிகள் முழுவதும் மரக்கன்றுகளை நடவு செய்தனர்.

இதில் மகிழம், வேம்பு, வில்வம் இயல்வாகை கருங்காலி இலுப்பை போன்ற மருத்துவ குணமுள்ள ஆயிரம் மரங்களை  நடவு செய்து   பாதுகாப்பு வேலி அமைத்தனர். மேலும் ஒவ்வொரு மரங்களின் குணங்கள் மற்றும் அதன் பலன்கள் குறித்து கிராம மக்களுக்கு விளக்கமளித்ததுடன் ஒரு மரத்தை வளர்த்து பாராமரிக்க  மரத்துக்கு இரண்டு  பராமரிப்பாளர்களை நியமித்துள்னர். அவர்கள் மரங்களை வளர்த்து பாதுகாக்கவேண்டும் என வேண்டுகோள் விடுத்துள்ளனர்.

இந்த மரம் நடும் முயற்சியில் மின் போதி அறக்கட்டளையுடன் இணைந்து தன்னார்வலர்கள் செல்வராஜ், சண்முகம் - வெள்ளாங்கோவில் பஞ்சாயத்து கிளார்க், கௌதம் மற்றும் முன்னாள் யூனியன் உறுப்பினர் ஞானசுந்தரம் ஆகியோர்கள் கிராம  பகுதியின் சுற்றுச்சூழலை பாதுகாக்கும் நோக்கில்  மரங்களை நடவு செய்த நிகழ்வு  அப்பகுதி இளைஞர்களையும் பொதுமக்களையும் வியப்பில் ஆழ்த்தியது.

வாக்காளர் அடையாள அட்டை வீடு தேடி வரும்: தலைமை தேர்தல் அதிகாரி சத்யபிரத சாஹூ

சென்னை, பிப்: தமிழகத்தில் முதலாவது முறையாக வாக்களிப்பவர்களுக்கு வாக்காளர் அடையாள அட்டையை இலவசமாக வழங்க, அஞ்சல் துறையுடன் 5 ஆண்டுகளுக்கு தேர்தல் ஆணையம் புரிந்துணர்வு ஒப்பந்தம் செய்துள்ளதாக தமிழக தலைமை தேர்தல் அதிகாரி சத்யபிரத சாஹூ தெரிவித்தார்.

தலைமைச் செயலகத்தில்செய்தியாளர்களிடம் அவர் கூறியதாவது: தமிழகத்தில் தற்போது 21 லட்சத்து 39 ஆயிரத்து 395 முதல் முறை வாக்காளர்கள் உள்ளதாக கணக்கிடப்பட்டுள்ளது. இவர்களுக்கு வண்ண வாக்காளர் அட்டை, இலவசமாக அஞ்சல் துறைமூலம் விரைவு அஞ்சலில் வீடுகளுக்கே அனுப்பி வைக்கப்படும்.

 இதற்காக 5 ஆண்டுகளுக்கு அஞ்சல் துறையுடன் புரிந்துணர்வு ஒப்பந்தம் செய்யப்பட் டுள்ளது. இதன் மூலம் அடுத்த 5 ஆண்டுகளுக்கு முதல்முறை வாக்காளர்கள் இலவசமாக வாக்காளர் அடையாள அட்டை பெற முடியும். வெளி மாநிலத்தவர்களுக்கும் இதேபோன்று அடையாள அட்டை வழங்கும் திட்டம் உள்ளது. அவர்கள் விண்ணப்பிக்கும்போது உரிய கட்டணம் வசூலிக்கப்படும். இந்திய தலைமை தேர்தல் ஆணையர் சுனில் அரோரா தலைமையிலான குழுவினர் பிப்.10-ஆம் தேதி சென்னை வருகின்றனர் என்றார் அவர்.