09/Mar/2020 03:33:24
உலகில் எல்லாப் பகுதிகளிலும் ஆண்டு முழுவதும் கிடைக்கும் ஆரஞ்சுப் பழத்தில் வைட்டமின் சி, நார்ச் சத்து, பி வைட்டமின்கள், வைட்டமின் ஏ, கால்சியம், பொட்டாசியம் ஆகியவை உள்ளன.
இவை, நோய் எதிர்ப்பு சக்தியை அதிகரிக்கிறது. ஆரஞ்சுப் பழங்களில் இருக்கும் வைட்டமின் சி, வைட்டமின் ஏ, பொட்டாசியம் ஆகியவை கண்களின் பார்வைத் திறனை அதிகரிப்பதோடு, கோடையில் குளிர்ச்சியை ஏற்படுத்துகிறது. இதனால்தான் கோடையின் அருமருந்தாகவும் இப்பழம் திகழ்கிறது.
அன்றாடம் ஓரு ஆரஞ்சுப் பழம் சாப்பிட்டு வந்தால், உங்கள் பார்வையில் பிரச்சினை முற்றாக தடுத்துவிடலாம்.உலோகங்கள் காற்றுப் பட்டவுடன் துருப்பிடிப்பதைப் போன்று, வயதாக வயதாக உடலின் தோலும் பாதிப்படையும். ஆனால், ஆரஞ்சுப் பழத்தில் இருக்கும் ஆக்ஸிஜனேற்றத் தடுப்பான்கள், வைட்டமின் சி ஆகிய சத்துகள் தோல் சுருங்காமலும், தோல் வியாதிகள் வராமலும் பாதுகாக்கின்றன.இதோடு, இப்பழத்தில் உள்ள ஃபோலேட்; ‘ஃபோலிக்’ அமிலம் ஆகியவை மூளையை சீரான நிலையில் வைத்திருக்க உதவுகின்றன.
மேலும், உடலின் நோய் எதிர்ப்பு ஆற்றலை அதிகரித்து புற்றுநோய் செல்களை எதிர்த்துப் போராட வைக்கிறது. ஒரு கப் ஆரஞ்சு சாறில் வெறும் 85 கலோரிகள்தான் இருக்கின்றன. ஊட்டச்சத்து அதிகமாகவும், கலோரிகள் குறைவாகவும் இருக்கும் சிறந்த பழங்களில் ஒன்று ஆரஞ்சு, அத்துடன், ஒரு கப் ஆரஞ்சில் 4.3 கிராம் நார்ச்சத்து நிறைந்திருக்கிறது.
அதனால், இது செரிமான மண்டலத்தைச் சீராக வைத்திருக்க உதவுகிறது. அத்துடன், இந்தப் பழத்தை சாப்பிட்டால் நீண்ட நேரம் உங்கள் வயிறு நிரம்பியிருக்கும்.
ஆரோக்கியமற்ற வாழ்க்கை முறை, சக்கை உணவை அதிகமாக உட்கொள்வதால் இதயத்தின் ரத்தக் குழாயில் அடைப்பு ஏற்பட்டு, இதய நோய்கள் உருவாகின்றன. ஆரஞ்சுப் பழத்தில் இருக்கும் ஃபிளேவனாய்ட்; ‘ஹெஸ்பெரிடின்’ ஆகியவை கொழுப்புச் சத்தைக் குறைத்து, ரத்தக் குழாயில் அடைப்பு ஏற்படாமல் தடுக்கின்றன. மாரடைப்பு, மற்ற இதய நோய்கள் வராமல் பாதுகாக்கவும் ஆரஞ்சுப் பழம் உதவுகிறது.உங்கள் கூந்தல் ஆரோக்கியமாக இருக்க வேண்டுமானால், அன்றாடம் ஒரு ஆரஞ்சுப் பழத்தை உட்கொள்வது சிறந்தது. ஊட்டச்சத்துகள் நிரம்பியிருப்பதாலும், வயிற்றிலிருக்கும் குழந்தைக்கு நரம்புக் குறைபாடுகள் ஏற்படுவதை தடுப்பதாலும்தான் கர்ப்பிணிப் பெண்களும் இந்தப் பழத்தை உட்கொள்ளலாம் என மகப்பேறு மருத்துவர்கள் பரிந்துரைக்க காரணமாகிறது.
தொகுப்பு: ஆ.அருண்குமார்.
