27/Sep/2020 06:45:38
ஈரோடு: தமிழகத்தில் நடைபெற உள்ள சட்டமன்ற தேர்தலில் பாஜகவுக்கு சிறப்பானதாக அமையும். சட்ட சபைக்குள் பாஜ வலுவாக செல்லும் என ஈரோட்டில் அக்கட்சியின் மாநில துணை தலைவர் அண்ணாமலை தெரிவித்தார்.
முன்னதாக அவர் செய்தியாளர்களுக்கு அளித்த பேட்டி:பெரியார் உருவச்சிலையில் காவிச் சாயத்தை யாரோ விஷமிகள் பூசிச் சென்றுள்ளனர். இதற்கு காவியின் அடையாளமாக இருக்க கூடிய பாஜகவை குறை கூறுவது தவறு. இதை அரசியல் ஆக்க வேண்டாம். காவி சாயத்தை பூசியவர்கள் மீது போலீசார் உடனடியாக நடவடிக்கை எடுக்க வேண்டும். பொதுவாகவே அரசியல் படுகொலைகள் அதிகமாக நடக்கும். பிற மாநிலத்தை ஒப்பிடுகையில் தமிழகம் கட்டுக்கோப்பாக உள்ள மாநிலம். தமிழகத்தில் வெடிகுண்டு கலாச்சாரம் அங்கொன்றும், இங்கொன்றுமாக நடந்து வருகிறது. இதனைக் கட்டுப்படுத்த போலீசார் உரிய நடவடிக்கை எடுக்க வேண்டும். அதிமுக வில் முதல்வர் வேட்பாளர் யார்? என அறிவிப்பது அவர்களுடைய உள்கட்சி பிரச்சனை. பாஜக வில் ஒரே வேட்பாளர் நரேந்திர மோடி தான். நாங்களும் நரேந்திர மோடியை வைத்து தான் ஓட்டு கேட்க போகிறோம். மக்களும் நரேந்திர மோடிக்கு தான் ஓட்டு போடுவார்கள். தமிழகத்தை சேர்ந்த பாஜக நிர்வாகிகளுக்கு தேசிய பொறுப்பில் நியமிக்காததற்கு அவர்களை புறக்கணிப்பதாக காரணம் ஆகாது. எச்.ராஜா தேசிய செயலாளராகவும், கேரளா பொறுப்பாளராகவும் இருந்து அவர் பணிகளை முடித்து விட்டார். தமிழகத்தில் சட்டமன்ற தேர்தல் வர உள்ளது. அதற்காக கட்சியின் மூத்த நிர்வாகிகளின் ஆலோசனைகள் மாநிலத்திற்கு வேண்டும் என்பதால் அவர்களுக்கு பொறுப்பு வழங்கப்படாமல் இருக்கலாம். அவர்களுக்கு விரைவில் வேறு பொறுப்புகள் அறிவிக்கலாம். கொரோனாவுக்கு பின் வழிப்பறி கொள்ளைகள் அதிகரிக்கும் என கூறப்பட்டது. ஆனால், தமிழகம் பாதுகாப்பான மாநிலமாகத்தான் நான் பார்க்கிறேன். கொரோனா சூழ்நிலையிலும், பாதுகாப்பு நடைமுறைகளை கடைபிடித்து நீட் தேர்வை மத்திய அரசு நல்ல முறையில் நடத்தி முடித்துள்ளது. கேரளா அரசு 10-ஆம் வகுப்பு தேர்வை நடத்தி முடித்துள்ளது. கொரோனா தடுப்பூசி வர அடுத்த ஆண்டு மார்ச், ஏப்ரல் ஆகி விடும். அதுவரை பள்ளிகள் திறக்காமலேயே இருக்க முடியாது. தமிழகத்தில் சுகாதார முறையை பின்பற்றி பள்ளிகள் திறக்கலாம். பாடத் திட்டம் குறைப்பது தொடர்பாக என்னிடம் கருத்துகள் இல்லை. சட்டமன்ற தேர்தலில் பாஜகவுக்கு சிறப்பாக இருக்கும். வலுவாக, வேரூன்றி சட்டசபைக்குள் செல்லும் என்றார் அண்ணாமலை.
இந்த கூட்டத்தில், மாவட்ட பொதுசெயலாளர்கள் குரு குணசேகரன், விவேகானந்தன், ஈஸ்வரமூர்த்தி, மூத்த நிர்வாகி சரவணன், மாநில செயற்குழு உறுப்பினர்கள் விநாயக மூர்த்தி, ராஜேஷ்குமார், மாவட்ட செயலாளர் கிருஷ்ணகுமார் உள்ளிட்ட பலர் கலந்து கொண்டனர்.
